గలగల జలజల పారే జీవనదులురా - Rally For Rivers Song Lyrics in Telugu

 జగ్గీ వాసుదేవ్ గారి 'నదుల రక్షణ' ఉద్యమానికి మద్దతునిద్దాం.

 

రచన - అప్పాలప్రసాద్ గారు

గానం, సంగీతం - జడల రమేష్ గారు

 

గలగల జలజల పారే జీవనదులురా

కాలుష్యపు కోరల్లో సొమ్మసిల్లెరా..

ప్రాణి కోటి మనుగడకు జీవనాడిరా

సిరులే పండించలేక మూగవోయెరా || గలగల ||

 

1. భూతల్లికి ఆభరణం - ప్రకృతి కే పచ్చదనం

నలువైపుల ప్రవహించి సౌరభాలు వెదజల్లెను

రసాయనపు వ్యర్థాలు, మురుగు చెత్త చెదారాలు- మన తప్పులతో తల్లి విలవిల్లాడుతు వుంది || గలగల ||

 

2. పంట చేల పరిపుష్టితో రైతే రాజుగ మారెను

సోయగాల కనువిందు తో కవిరాజే గళమెత్తెను

దుర్గంధం ముక్కుపుటాలదిరేలా చేరుతుంది

ఆహారపు దిగుబడులే అంతకంత దిగజారెను || గలగల ||

 

3.ఆధ్యాత్మిక నెలవాలం-ఆర్థికంగ సౌభాగ్యం

సకల జీవరాశులన్ని ఊపిరితో నడయాడెను

నీరు తగిలితే మొక్కలు మాడి మసై పోతుంటే

నీరు త్రాగి పశు పక్షులు ప్రాణాలే కోల్పోయెను || గలగల ||

 

4. గంగ,యమున,గోదారి,కృష్ణ ఎండిపోతోంది

ఎడారి యై మన భూమిలో కరువు తాండవిస్తుంది

ప్రమాద ఘంటికలే మ్రోగుతుంటె వినలేవా

నిజ నిజాలు నీ కన్నులతోనైనా కనలేవా|| గలగల ||

 

5. చెట్లు నరికి వేస్తుంటే - ఇసుక ఎత్తి పోస్తుంటే

పరివాహక ప్రాంతాలే ఆక్రమించి దోస్తుంటే

నదులపైన అడ్డగోలు ఆనకట్టలేస్తుంటే

విచక్షణా రహితంగా నది జలాలు తోడుతుంటే || గలగల ||

6.వరద ముప్పు తగ్గాలి కరువు నివారించాలి

భూమికోత అరికట్టి భూసారం పెంచాలి

భూగర్భ జలాలతో భూమి పొంగి పోవాలి

కళకళ లాడే జలాలు జీవుల పోషించాలి || గలగల ||

 

7.నదులకు ఇరువైపులా వృక్షాలే పెంచాలి

వృక్షాలాధారంగా వ్యవసాయం చేయాలి

తరతరాల వారసత్వ భారతీయ సంపదలై

జీవనదులు సవ్వడితో నిత్యం ప్రవహించాలి || గలగల ||